Министерството за образование и наука (МОН) ги потсети студентите дека од денеска, 1 октомври, започнува рокот за пријавување за стекнување на правото на субвенциониран студентски оброк за академската 2026/2027 година.
Овој активен рок за поднесување на апликации ќе трае кратко, заклучно со 5 октомври 2026 година. Од МОН информираат дека студентите кои ќе се пријават во овој предвиден период, правото на користење на субвенционираниот оброк ќе можат да го остварат од 1 ноември 2026 година.
Правото на субвенциониран студентски оброк можат да го користат сите редовни студенти на додипломски студии кои имаат месечен приход помал од минималната нето плата, како и студентите запишани на постдипломски и на интегрирани студии на државните и приватните универзитети во земјава.
Од Министерството потенцираат дека оваа можност е отворена за сите кои ги исполнуваат условите, а досега не аплицирале, како и за студентите на кои претходно им било прекинато или одбиено правото, а сметаат дека сега ги исполнуваат критериумите.
Аплицирањето се врши електронски преку порталот: https://e-uslugi.mon.gov.mk.
Сите детални услови и критериуми се достапни на следниот линк: https://mon.gov.mk/mk-MK/konkursi-i-stipendii/konkursi-mon/javen-povik-za-ostvaruvanje-na-pravoto-na-subvencioniran-studentski-obrok-za-akademskata-20262027-godina. За техничка поддршка при аплицирањето, студентите можат да го контактираат МОН преку е-пошта: subvencioniran.obrok@mon.gov.mk.
Дополнително, од МОН информираат за новина во начинот на плаќање: поради законска регулатива за засилена автентикација при бесконтактни плаќања на ПОС-терминали, студентите ќе треба да го внесат ПИН-кодот за трансакциите да бидат успешни. Шпаркасе банка објави две важни известувања во врска со оваа новина и поддршка за студентите, достапни на следниве линкови: https://www.sparkasse.mk/mk/soopshtenija/2025/01/16/Izvestuvanje-za-upotreba-na-PIN-pri-plakanja и https://www.sparkasse.mk/mk/soopshtenija/2025/01/14/Izvestuvanje-za-korisnici-na-subvencioniran-obrok. Доколку студентите го знаат или го чуваат ПИН-кодот, нема потреба од реактивација.