Од полноќ имаме нови цени на горивата. Бензините поскапеа за еден денар по литар, додека дизелот поевтине за 4,5 денари и се продава по 100 денари за литар.
ЕУРОСУПЕР БС-95 чини 100 денари, а ЕУРОСУПЕР БС-98 – 102 денари за литар. Екстра лесното масло за домаќинство поевтинува за три денари и се продава по 111,50 денари за литар, додека мазутот чини 49,882 денари за килограм.
Според Регулаторната комисија за енергетика, со новата пресметка малопродажните цени на нафтените деривати во просек се намалуваат за 1,06 проценти во однос на цените од 21 септември.
Клучната промена е кај дизелот. Неговата референтна цена на светскиот пазар во изминатиот период се намалила во просек за 6,7 проценти, или за повеќе од 107 долари по тон. Кај бензините, пак, берзанската цена практично останала непроменета, со минимален раст од 0,049 проценти.
Во пресметката влијаел и курсот на доларот. Денарот во однос на американската валута во просек бил послаб за нешто помалку од еден процент, што делумно го намалило ефектот од поевтинувањето на дизелот на светските берзи.
Дополнително, Владата донела одлука повластената стапка на ДДВ од 10 проценти за дизелот да продолжи да се применува и во оваа пресметка.
Продолжена е и мерката за намалена акциза од четири денари по литар за бензините и дизелот.
Со комбинацијата од пониска берзанска цена на дизелот, задржаното ДДВ од 10 проценти и намалената акциза, дизелот од полноќ ќе биде поевтин за 4,5 денари по литар.
Новите цени ќе важат до следната пресметка на Регулаторната комисија.