Внесување на Бугарите во Устав е условот кој Македонија мора да го исплони за да го продолжи процесот на евроинеграции, изјави еврокомесарката за проширување Марта Кос во интервју за бугарската „БНТ“. Таа беше прашана и дали и како Европската комисија може да влијае врз Скопје да ги направи уставните измени и одговори дека верува оти со новата бугарска влада ќе се најде начин процесот со Македонија да продолжи.
„Ова е многу добро прашање и би била многу среќен ако го искористиме овој момент на проширување и за Северна Македонија. Верувам во новата бугарска влада, со која соработувам многу добро. Сите ние заедно ќе најдеме начин да го придвижиме процесот напред со Северна Македонија. Секако, владата во Северна Македонија мора да го одржи своето ветување. Тие мора да го променат својот Устав, ова е договорено меѓу Северна Македонија и 27-те земји-членки на ЕУ. Откако ќе се направи ова, ќе сметам и на поддршката од вашата земја, за да продолжиме напред и со Северна Македонија“, изјави Кос.
Во интервјуто за „БНТ“ еврокомесарката Кос кажа дека проширувањето на ЕУ останува приоритет и дека претстојниот период ќе биде значаен за земјите кандидати.
„Оваа есен ќе биде есен на проширувањето. Многу ми е драго што го интензивираме процесот. Подготвуваме патокази за земјите што се најнапред во преговорите. Црна Гора е најблиску до пристапување, а за Албанија, Молдавија и Украина ќе претставиме патокази во кои ќе бидат наведени сите технички чекори што треба да се преземат до крајот на нашиот мандат“, рече Кос.
Таа нагласи дека паралелно со поддршката за земјите кандидати, Европската комисија работи и на подготовка на земјите членки за ново проширување.