Премиерот Христијан Мицкоски порача дека државната химна и државните симболи мора да ги почитуваат сите граѓани, без разлика на нивната етничка припадност, оценувајќи дека ова прашање е јасно регулирано со Уставот и законите.
„Тоа е државна химна и без разлика на нашата етничка припадност, ние сме граѓани на оваа земја и треба да ги почитуваме симболите на оваа земја“, изјави Мицкоски.
Тој додаде дека истовремено мора да се почитуваат и националните симболи на различните етнички заедници, согласно законите што ја регулираат нивната употреба.
„Интонирањето на државната химна претставува обврска на сите граѓани да ја почитуваат, без разлика од каква етничка припадност се – Македонци, Албанци, Турци, Срби, Власи, Бошњаци, Роми или останати. Почитувањето на државната химна треба да биде свето, исто како што треба коректно да се почитуваат и националните симболи на различните етнички заедници“, рече премиерот.
Мицкоски оцени дека е несоодветно во 21 век да се отвораат дебати дали треба да се интонира државната химна.
„Во ера на вештачка интелигенција, дата центри и нови предизвици со кои се соочува човештвото, ние да зборуваме за интонирање на државната химна – без разлика колку некому му се допаѓа или не – мислам дека е погрешен фокус“, изјави тој.
Премиерот повика дебатата да се насочи кон теми што го зајакнуваат заедништвото.
„Би советувал да се фокусираме на единството, а ваквите теми можеби ќе привлечат внимание кај мала група луѓе, но не мислам дека тоа е она на што треба да се концентрираме“, порача Мицкоски.