И покрај дождливите бранови, во текот на вчерашниот ден ширум државата се регистрирани најмалку 31 пожар на отворен простор, соопшти директорот на Дирекцијата за заштита и спасување, Стојанче Ангелов.
Најкритично е кај скопските села Грачани и Никиштане, каде што пожарот премина од косовска страна, а поради ветерот синоќа чад се почувствува во повеќе скопски општини.
За ангажманот на службите на овој потег, Ангелов истакна:
Врз него овие денови дејствуваме и од воздух и од земја, но за жал сѐ уште е активен. Синоќа почна да дува ветер од насока од пожарот кон Град Скопје и чадот можеа да го почувствуваат скопјани од повеќето скопски општини. Чадот предизвика вознемиреност помеѓу поголем дел од населението на Град Скопје.
Тој потенцираше дека се преземаат интензивни мерки од воздух и земја:
Тие работат по огнената линија, по самата линија на огнот, обидувајќи се истата да ја намалат. Од воздух поддршка дава еден армиски хеликоптер, еден полициски хеликоптер, како и два ер-трактори на Дирекцијата за заштита и спасување. Во овој момент слободно можам да кажам дека двете села Грачани и Никиштане не се загрозени од пожарот, иако кај населението постои одредена загриженост. Очекувам до доцна во вечерва овој пожар да биде ставен под делумна контрола.
Втората сложена жариште е на подрачјето меѓу Струга и Дебар, каде што огнот зафати мешовита шума и нискостеблеста вегетација на тешко пристапен терен.
Во попладневните часови врз него ќе дејствуваме со ер-тракторите на Дирекцијата за заштита и спасување – соопшти Ангелов.
Оделот за заштита и спасување алармира и за нови намерни палења на планината Китка, во општините Студеничани и Зелениково, како и во подножјето на Жеден кај селото Копаница.
Благодарение на храбрата и пожртвувана работа на скопските пожарникари, овие пожари се изгаснати, но да укажам дека ваквото палење на разни пожари на територијата на Град Скопје ги расфрла нашите сили. Затоа апелирам до граѓаните да бидат исклучително внимателни, со своето однесување да не предизвикаат пожар, но исто така да бидат внимателни и доколку забележат сомнително однесување, истото да го пријават на бројот 112 или во најблиската полициска станица или на било кој полицаец или пожарникар.
Во однос на сомнежите за намерни палења на планината Жеден, тој додаде:
Минатите денови мака мачевме гаснејќи го големиот пожар којшто се одвиваше на оваа планина, но некој упорно и упорно повторно подметнува нови пожари од сите страни на планината Жеден, и од скопска и од тетовска страна.
Надлежните апелираат на максимална одговорност од граѓаните бидејќи опасноста од нови ширења на огнот сè уште не е помината.