Истражните органи идентификуваа двајца осомничени за нападот со беспилотно летало што се случи на аеродромот во Лајпциг на 4 август.
Според информациите на германските медиуми „Зидојче Цајтунг“, „НДР“ и „ВДР“, станува збор за роден Русин кој поседува латвиски пасош и Белорусин со руски пасош.
Весникот „Билд“ пренесува дека полицијата во моментот трага по најмалку четири лица, откако на местото на инцидентот се пронајдени нивни ДНК траги или нивните мобилни телефони биле лоцирани во близина на аеродромот.
Федералниот министер за внатрешни работи Александар Добринт директно ја обвини Русија за организирање на инцидентот.
„Полициската истрага, шемата на нападот и разузнавањето јасно укажуваат на руската одговорност за обидот за напад во Лајпциг. Затоа, федералната влада заклучи дека Русија стои зад хибридниот напад на 4 август“, изјави Добринт во Берлин.
Во заедничка изјава со министерот за надворешни работи Јохан Вадефул, Добринт нагласи дека случувањата во Лајпциг се дел од поширока низа хибридни акции, но додаде: „Ние не сме во војна“.
Германската влада како одговор најави мерки за затворање на Руската куќа и Генералниот конзулат, како и засилен притисок врз „флотата во сенка“ на Русија, преку која се заобиколуваат санкциите.
Како реакција на овие одлуки, официјална Москва го повика германскиот вршител на должноста амбасадор Бернд Финке (63) на разговор во руското Министерство за надворешни работи.
Од руското МНР соопштија дека Финке е повикан поради „антируски потези и изјави на германски функционери“ и објавија видео од неговото пристигнување.