Уште две линии од проектот „Градски воз“ треба да бидат ставени во функција до крајот на 2027 или најдоцна до почетокот на 2028 година, најавуваат од „Македонски железници – Инфраструктура“.
Проектната документација за двете линии сè уште е во изработка, а според директорот Синиша Ивановски, проектирањето треба да заврши до крајот на октомври.
Едната линија треба да сообраќа од Волково, преку Ѓорче Петров и Скопје Север, до Железничката станица во Скопје, во должина од околу 18 километри. Третата линија е предвидено да ги поврзе Миладиновци, Илинден и Маџари со централната железничка станица и ќе биде долга околу 20 километри.
Доколку бидат обезбедени потребните средства, градежните работи би можеле да почнат до крајот на годинава.
Првата линија на „Градски воз“, на релацијата Зелениково – Скопје, веќе е пуштена во функција. Реконструирани се 25 километри железничка мрежа, а патувањето трае околу 25 минути.