Голем пожар кој во текот на ноќта навлегол од косовска страна се шири во атарот на селото Грачани, а мирисот од чадот се чувствува и во делови од Скопје, информира директорот на Дирекцијата за заштита и спасување Стојанче Ангелов.
Пожарот има огнена линија подолга од пет километри. На терен се скопските пожарникари и тимови на Дирекцијата за заштита и спасување, кои се обидуваат да воспостават делумна контрола и да спречат загрозување на околните села. Според Ангелов, засега нема непосредна опасност за населените места.
Во Штипскиот регион, пожарот меѓу селата Пухче и Селце е делумно ставен под контрола. Критичен останува еден крак кон Селце на планината Серта. Во текот на ноќта огнот се приближил до викенд-куќи, но пожарникарите успеале да ги заштитат и нема повредени лица.
Командирот на ТППЕ Штип, Благој Ренџов, рече дека постојат информации и сведоштво дека пожарот бил подметнат, за што е известена и СВР Штип.
Пожарот на Пелистер е ставен под целосна контрола, но на одредени места сè уште има чадење и нови жаришта. Нови огнени точки се појавиле и на подрачјето на Студеничани, во атарите на Количани и Цветово.
Активен е и тежок пожар на границата меѓу општините Струга и Дебар, кај селата Луково и Буринец. Поради опасноста огнот да се приближи до населени места, утрово бил испратен армиски хеликоптер.
Во текот на вчерашниот ден во земјава биле регистрирани повеќе од 41 пожар на отворен простор.