Премиерот Христијан Мицкоски денеска присуствуваше на промоцијата на проектот „Градски воз“, оценувајќи дека неговата реализација е чекор напред во подобрувањето на транспортот и заштитата на животната средина.
Тој посочи дека проектот бил реализиран за околу една година и рече дека условите на делницата од Зелениково до Централната железничка станица во Скопје се „европски“.
„Дали со ова ги решаваме сите проблеми? Нема да ги решиме, но дали е ова чекор напред? Да, е чекор напред“, рече Мицкоски, додавајќи дека проектот може да придонесе и во намалување на загадувањето, особено пред почетокот на грејната сезона.
Премиерот најави дека Владата ќе продолжи со реализација на проектите од својата програма, оценувајќи дека нивното спроведување го зголемува кредибилитетот на институциите и ја менува перцепцијата за државата.
Мицкоски им се заблагодари на Министерството за транспорт, Македонски железници, локалните власти и сите институции вклучени во проектот и порача дека очекува во следниот период да бидат реализирани уште многу вакви проекти.
Тој истакна и дека жителите на Зелениково ќе бидат директни корисници на новата линија и дека со воз ќе можат за кратко време да стигнат до центарот на Скопје.