СДС е хистеричен и само декларативно е прозападно ориентирана партија, додека во пракса се покажува дека е на линија на Кина и против САД, велат од ВМРО-ДПМНЕ.
Од партијата обвинуваат дека СДС преку, како што велат, „лажење, заплашување и хистерија“ се спротивставува на можноста во Македонија да се градат дата-центри и да се развива ИТ-индустријата.
„Изговорите им се дека со тоа ќе се зголеми потрошувачката на електрична енергија, ќе се зголеми цената на струјата и дека ќе се загрозела водата за пиење“, велат од ВМРО-ДПМНЕ.
Оттаму додаваат дека истите тези, според американски медиуми, ги користеле и кинески ботови на социјалните мрежи во САД, со цел да ја свртат јавноста против изградбата на дата-центри и системи за вештачка интелигенција.
„На нас не ни требаат кинески ботови, за тоа го имаме талогот на СДС на чело со Венко Филипче, кои се на иста линија со Кина, против нашиот стратешки партнер САД и против развојот на нашата држава“, стои во партиското соопштение.
ВМРО-ДПМНЕ прашува дали СДС би претпочитал во државата да инвестираат кинески компании наместо напредни ИТ-компании од САД.
Од партијата го обвинуваат СДС и за, како што наведуваат, фаворизирање на „марихуана економија“ за сопствени интереси, посочувајќи дека за време на седумгодишното владеење биле доделени околу 70 лиценци за производство на марихуана.
„Македонија мора да развива и да обезбедува напредни и добро платени работни места преку инвестиции во вештачката интелигенција и ИТ-секторот, затоа што тоа е иднината и во таа насока се движи светот“, велат од ВМРО-ДПМНЕ.