Во последните 24 часа на територијата на земјава се евидентирани 26 пожари на отворен простор. Од нив, 20 се целосно локализирани, четири се ставени под контрола, додека два пожари сè уште се активни, информира Центарот за управување со кризи (ЦУК).
Според состојбата до 7:30 часот, активен пожар има на просторот меѓу селата Копаница и Радуша во Општина Сарај. Таму огнот зафатил нискостеблеста шума и ниска вегетација.
Активен е и пожарот во штипскиот регион, на потегот меѓу селата Селце, Пухче, Степанци и Лакавица, каде што гори ниска вегетација.
Четири пожари се под контрола. Во Македонски Брод, во близина на селата Битово, Заград и Страјане, пожарот зафатил нискостеблеста шума, ниска вегетација, пасишта и папрат. Под контрола е и пожарот на Градската депонија „Острец“ во Делчево.
Во истата категорија се и пожарот кај селото Драгов Дол во Општина Македонски Брод, како и огнот над селото Палиград во Општина Зелениково.
Во текот на деноноќието целосно се изгаснати уште 20 пожари. Интервенции имало на различни места, меѓу кои кај Градец во Општина Врапчиште, Подмочани во Ресен, Нежилово во Општина Чашка и Урвич во Општина Боговиње.
Пожари биле регистрирани и на повеќе локации во Гази Баба, Струга, Долнени, Кичево, Ново Село, Старо Нагоричане, Желино, Кавадарци и Свети Николе.