Новата учебна 2026/2027 година ќе почне со 26 привремено затворени подрачни училишта поради недоволен број ученици. Во дел од нив нема ниту едно запишано прваче, а во други наставата досега ја следеле само неколку деца.
Учениците од овие подрачни училишта ќе го продолжат образованието во најблиските поголеми училишта.
Намалувањето на бројот на ученици доведе и до оптимизација на паралелките. Според министерката за образование Весна Јаневска, во новата учебна година ќе има вкупно 433 паралелки помалку – 222 во основното и 211 во средното образование.
Во образовниот систем има околу 238.000 ученици, од кои 174.000 основци и 64.000 средношколци. Досега се запишани 14.952 првачиња и 16.932 ученици во прва година средно образование, а конечните бројки ќе бидат познати по дополнителните уписни рокови.
Јаневска информира дека малите паралелки се спојуваат поради намалениот број ученици и посочи дека ниту еден редовно вработен наставник не останал без работа поради оптимизацијата.
Во земјава во моментов има и 148 училишни објекти без ниту еден ученик, најголем дел во помалите и руралните населени места.
Паралелно, во тек е проширување на капацитетите на 14 училишта, главно во скопските општини, а во следните месеци треба да почнат уште 15 вакви проекти.