Ел Нињо продолжува да се зајакнува, а според најновата проценка на американската Национална управа за океани и атмосфера – NOAA, постои повеќе од 90 проценти веројатност дека феноменот ќе стане многу силен во текот на есента и зимата 2026/2027 година.
Проценките покажуваат и 69 проценти веројатност дека во периодот од октомври до декември Ел Нињо ќе достигне ниво кое, според релативниот индекс RONI, би го направило најсилниот регистриран од 1950 година.
Ел Нињо се јавува кога ослабуваат пасатните ветрови кои вообичаено ги придвижуваат топлите површински води во екваторијалниот Пацифик кон запад. Тогаш топлата вода се поместува кон централниот и источниот Пацифик, што предизвикува промени во атмосферскиот притисок, врнежите и ветровите и може да влијае врз временските услови во различни делови од светот.
NOAA проценува дека постои 95 проценти веројатност Ел Нињо од октомври до декември да биде во категоријата на многу силни настани. Веројатноста феноменот да продолжи и во периодот од февруари до април 2027 година се проценува на 97 проценти, а од март до мај на 82 проценти.
Сепак, од NOAA предупредуваат дека дури и исклучително силен Ел Нињо не значи дека очекуваните последици ќе се почувствуваат на ист начин во сите делови од светот.
За Европа, сезонската прогноза на Коперникус покажува зголемена веројатност за натпросечно топла есен во речиси целиот континент. Моделите покажуваат и можност за повеќе врнежи од просекот во јужна и западна Европа.
Прогнозите за врнежите во Европа, сепак, се помалку сигурни од оние за тропските региони. Влијанието на Ел Нињо врз Европа е индиректно и зависи и од состојбата на северниот Атлантик, Северноатлантската осцилација, поларниот вртлог, температурата на Средоземното Море и други фактори.