СДСМ денеска преку прес-конференција на портпаролката и членка на ИО, Богданка Кузеска, упати обвинувања до премиерот Христијан Мицкоски дека далеку од очите на јавноста договара бизниси со стратешките ресурси на државата.
„Секој ден излегуваат нови детали кои го потврдуваат она за што СДСМ предупредува: под радарот, далеку од очите на граѓаните, се договараат бизниси со стратешките ресурси на Македонија: водата, струјата, земјата. Мицкоски вели дека се ќе биде транспарентно а јавно признава дека преговара со 5-6 инвеститори. Со кого се договара Мицкоски ‘под радарот’ никој не знае. Имиња не се објавуваат“, изјави Кузеска.
Таа праша на кого му се ставаат на располагање ресурсите и колку тоа ќе ги чини граѓаните во пари, вода и плодно земјиште, оценувајќи дека премиерот работи без транспарентност.
Од СДСМ реагираа и на изјавите на пратеникот од ВМРО-ДПМНЕ, Миле Лефков, истакнувајќи дека тврдењата оти комерцијалните дата-центри се поврзани со европската реформска агенда претставуваат манипулација.
„Тврдењата дека комерцијалните дата центри имаат врска со Реформската агенда со Европската Унија е класична лага. Што има заедничко националниот дата-центар за чување на податоци на државните институции со комерцијалните дата-центари што Мицкоски ги договора за некој странски инвеститор, со огромна потрошувачка на струја и вода? Апсолутно ништо“, рече Кузеска.
Според портпаролката на опозициската партија, ВМРО-ДПМНЕ ги меша јавните обврски со приватните инвестиции за да ги покрие приватните интереси и неисполнетата Реформска агенда.
„ВМРО-ОКГ толку многу лаже и свесно ги манипулира граѓаните за да ги збуни и да ја прикрие вистинската намера – ресурсите на државата да ги стави во функција на приватни интереси за профити и провизии. Ова е обид да се оправда нешто што нема никаква врска со европската агенда, туку со тендерски апетити“, заклучи Кузеска.