Транспортерите од земјите од Западен Балкан денеска напладне одржуваат двочасовни јавни собири пред седиштата на делегациите на Европската Унија во Скопје, Белград, Подгорица и Сараево. Превозниците бараат итно решение за проблемот со ограничениот престој на професионалните возачи во земјите од Шенген-зоната.
Душан Николиќ од Бизнис асоцијацијата на меѓународни патни транспортери „Меѓународен транспорт“ за Танјуг изјави дека собирот во Белград ќе се одржи пред просториите на Делегацијата на ЕУ во Србија, Авенија 19а. Владимира Поповиќа 40/В.
„Ќе дојдеме пеш пред просториите на ЕУ. Покрај возачите на камиони и автобуси, ќе има и 10 камиони. Ќе предадеме писмо со кое ќе бараме ограничувањето за нашиот престој во земјите од Шенген зоната веднаш да се суспендира“, рече тој вчера.
Николиќ додаде дека протестите во другите три градови од Западен Балкан ќе изгледаат исто.
Доколку барањата не бидат исполнети, транспортерите од Северна Македонија, Србија, Босна и Херцеговина и Црна Гора најавија дека на 14 септември ќе организираат протести и блокади на граничните премини кон земјите од Европската Унија.
Ова е втор протест на транспортерите по оној во јануари, кога побараа укинување на Шенгенското правило „90/180“. Според ова правило, граѓаните од земјите надвор од Унијата можат да престојуваат максимум 90 дена на Шенгенската територија во период од 180 дена.