Претседателот на Собранието Африм Гаши денеска ќе одржи брифинг со новинарите, прв по летната пауза во работата на пратениците. На средбата се очекува да ги презентира плановите и активностите што следуваат во Парламентот во наредниот период.
Пратениците на пленарна седница се враќаат в среда, 2 септември, кога е закажана 121. седница. На дневен ред се 53 точки, меѓу кои предлог за именување вицегувернер на Народната банка, повеќе ратификации, како и Предлог-законот за пријавување и проверка на странски директни инвестиции, во прво читање.
На седницата ќе се разгледува и Предлог-националната стратегија за безбедност на сообраќајот на патиштата за периодот 2026–2030 година, како и повеќе законски измени по скратена постапка, главно поврзани со усогласување со новиот Закон за високите раководители.
По одбележувањето на Денот на независноста – 8 Септември, Собранието повторно ќе заседава на 11 септември. За овој датум е закажана 122. седница, на која по утврдувањето на дневниот ред е предвидено и поставување пратенички прашања од опозицијата.
На дневен ред засега се шест точки, меѓу кои измени на законите за застапување на Република Македонија пред Европскиот суд за човекови права, за комуналните дејности, за градење, за превоз во патниот сообраќај и за санитарната и здравствената инспекција. Сите се предложени по скратена постапка. На дневен ред е и Предлог-законот за државната ревизија, во прво читање.
Работата на Собранието практично продолжи уште минатата недела, кога заседаваа повеќе собраниски комисии, а пратениците имаа и други активности.
Летната пауза во работата на Собранието традиционално се користи во текот на август, по што во септември продолжува редовната пленарна и комисиска работа.