Во изминатите 24 часа на територијата на земјава се регистрирани вкупно 24 пожари на отворен простор. Од нив, седум сè уште се активни, еден е ставен под контрола, додека 16 се целосно изгаснати, информира Центарот за управување со кризи (ЦУК).
Според последните информации, заклучно со 7:30 часот, активни се пожарите меѓу селата Бела Црква и Подмочани во Општина Ресен, каде гори борова шума и ниска вегетација, како и на потегот меѓу Копаница и Радуша во Општина Сарај, каде е зафатена нискостеблеста шума и ниска вегетација.
Пожари сè уште има и над селото Палиград во Општина Зелениково, над селото Нежилово, на месноста Сватови во Општина Чашка, во близина на селото Урвич во Општина Боговиње, кај селото Градец во Општина Врапчиште и кај селото Драгов Дол во Општина Македонски Брод.
Пожарот кој се шири од реонот на селото Трново во Општина Гостивар кон селата Битово, Заград и Страјане во Општина Македонски Брод е ставен под контрола. Таму биле зафатени нискостеблеста шума, ниска вегетација, пасишта и папрат.
Во истиот период, пожарникарите изгаснале уште 16 пожари на отворен простор во повеќе делови од земјава. Пожари биле регистрирани и во општините Илинден, Ѓорче Петров, Прилеп, Долнени, Ресен, Богданци, Струга, Делчево, Старо Нагоричане, Јегуновце, Тетово, Брвеница, Врапчиште и Маврово-Ростуше.