Министерството за внатрешни работи ја објави конечната ранг-листа на ученици примени во Средното полициско училиште „7-ми Мај“. На објавената листа се наоѓаат 310 ученици.
Примените ученици на 1 септември во 10 часот треба да се јават во Полициската академија на МВР во Идризово, во придружба на еден родител, старател или законски застапник. Потребно е придружникот да носи документ за идентификација, а таму ќе биде потпишан договорот за школување.
Учениците ќе престојуваат во Полициската академија до 4 септември во 15 часот. Поради интернатското сместување, треба да понесат облека, спортска облека, средства за лична хигиена и други неопходни лични работи. Од МВР препорачуваат да не носат вредни предмети.
Пред почетокот на школувањето, примените ученици треба да се отпишат од средното училиште во кое досега биле запишани како редовни ученици и да побараат да бидат избришани од системот ЕМИС ЕСАРУ за електронски дневник.
Конечната ранг-листа е објавена и во просториите на Средното полициско училиште „7-ми Мај“.
МВР во јули објави јавен повик за прием на редовни ученици во обновеното средно полициско образование. Право на пријавување имаа ученици кои ја завршиле втората година од средното образование, се македонски државјани, на денот на објавувањето на повикот немале наполнето 18 години и ги исполнувале предвидените здравствени и психофизички услови.