Внатрешната контрола на Министерството за внатрешни работи истражува сомнежи дека вработени во управните служби незаконски додавале повисоки категории во возачки дозволи, со што на лица кои никогаш не полагале за камион или автобус им овозможувале да добијат Ц или Д категорија.
Според информации објавени во дел од медиумите, за ваква услуга наводно се плаќале околу 1.400 евра. Од МВР потврдуваат дека случајот е предмет на постапување.
„Од страна на Одделот за внатрешна контрола, криминалистички истраги и професионални стандарди при МВР, известено е надлежното Основно јавно обвинителство и во координација со обвинителството се преземаат соодветни активности за расчистување на случајот“, велат од Министерството.
Со случајот е запознаен и обвинител од Основното јавно обвинителство Скопје, но постапката засега се води во рамки на МВР. Истрагата треба да утврди колку вработени биле вклучени во шемата и колку лажни возачки дозволи биле издадени.
Според досегашните информации, дел од осомничените биле затекнати во момент кога во системот додавале категории кои возачот реално не ги поседувал.
Шемата, според сознанијата, функционирала така што возачот најпрво пријавувал дека ја изгубил дозволата и поднесувал барање за нова. При постапката за фотографирање и изработка на новиот документ, во дозволата дополнително се внесувала повисока категорија за камион или автобус, иако лицето претходно не полагало за неа.
Меѓу лицата кои сега се предмет на истрагата има и вработени кои претходно биле поврзувани со аферата со лажни пасоши, откриена пред пет години.
Во тој случај, десетмина вработени во МВР беа осудени на затворски и условни казни за издавање лажни патни исправи. Според пресудата, за секој издаден пасош се наплаќале по неколку илјади евра, а биле користени податоци од македонски државјани кои никогаш немале извадено пасош, во комбинација со фотографии и лични податоци на странски државјани.
На тој начин биле издадени повеќе од 200 лажни пасоши, а дел од нив завршиле кај лица поврзани со организиран криминал и трговија со дрога, вклучително и кај лица барани со меѓународни потерници.