Иван Стоилковиќ, соработник на премиерот Христијан Мицкоски и министер во неговата Влада, отворено работи за кинеската и руската агенда, изјави Кети Штерјова на денешната прес-конференција на СДСМ.
Според неа, по повеќегодишното застапување на српски и руски интереси, како и по кредитот од една милијарда евра што Мицкоски го зеде преку унгарскиот премиер Виктор Орбан, Стоилковиќ сега промовира проекти и најавува стратешки инвестиции со кинески пари.
„Додека САД јасно гледаат во Кина и Русија закана за стабилноста и евроатлантската интеграција на регионот, министер на Мицкоски отворено промовира кинеска соработка и патува во Кина“, истакна Штерјова.
Од опозициската партија се повикуваат и на официјални оценки од Вашингтон во однос на регионалното влијание на овие земји.
„Во стратешки документ на Стејт департментот се нагласува дека Кина и Русија се малигни актери кои активно се обидуваат да ја искористат нестабилноста, корупцијата и слабата управуваност во Западен Балкан за да го прошират своето влијание“, изјави Штерјова.
Таа додаде дека Стоилковиќ јавно ги подрива стратешките интереси на земјава во соработка со уредникот на „40% од Орбановите медиуми – Началникот Латас“.
Според СДСМ, ова влијание дополнително ќе се зголеми со доаѓањето на српската медиумска мрежа преку медиумите „Ало“ и „Еуроњус“ во Македонија, предводени од Ивона Талевска.
„Ништо не е случајно. Ова е свесна политика на Мицкоски и неговата криминална група – да ја држат Македонија далеку од ЕУ, во изолација а поблиску до авторитарни сили и источни влијанија“, порача Штерјова, додавајќи дека граѓаните заслужуваат европска иднина, а не да бидат заложници на туѓи интереси.