Цирих и во 2026 година е прогласен за најпаметен град во светот, седма година по ред. Швајцарскиот град повторно се најде на врвот на Smart City Index на Меѓународниот институт за развој на менаџментот – IMD, во конкуренција на 148 градови од целиот свет.
Рангирањето не се базира само на тоа колку технологија користи еден град, туку и на тоа колку таа технологија реално им го олеснува животот на граѓаните. Се оценуваат економската и технолошката инфраструктура, квалитетот на живот, животната средина и инклузивноста.
Особено важен дел од индексот е перцепцијата на самите жители, односно како тие го оценуваат секојдневното функционирање на градот. Цирих е единствениот град што годинава добил вкупна оценка ААА.
На второто место е Осло, а потоа следуваат Женева, Лондон, Копенхаген и Дубаи. Лозана е седма, што значи дека Швајцарија има дури три града меѓу најдобро рангираните.
Индексот годинава донесе и неколку поголеми поместувања. Вашингтон напредувал за 23 позиции и стигнал до 39. место, додека саудискиот Ал Ула скокнал за 27 места и се искачил на 85. позиција. Најдобро рангиран американски град е Бостон, на 35. место.
Но, ниту најпаметниот град во светот не е без проблеми. Дури 82 проценти од жителите на Цирих го посочиле прифатливото домување како најголем предизвик, 60 проценти се загрижени поради сообраќајните метежи, а 47 проценти ја издвоиле невработеноста.
Слични проблеми се повторуваат и во другите градови опфатени со истражувањето. На глобално ниво, најчесто се издвојуваат високите трошоци за домување, сообраќајниот метеж и безбедноста.
Резултатите покажуваат дека „паметен град“ не значи само повеќе апликации, сензори и дигитални услуги, туку пред сè град кој успева технологијата и јавните политики да ги претвори во подобар и поедноставен живот за своите жители.