Вицегувернерката на Народната банка, Ана Митреска, учествуваше на 13. Биенална конференција на Комитетот на Ирвинг Фишер за статистика на централните банки (IFC), која се одржа во Базел во организација на Банката за меѓународни порамнувања (БИС).
Конференцијата годинава беше посветена на унапредувањето на статистиката во централното банкарство преку поефикасно користење на податоците и примената на иновативни алатки.
Митреска ја модерираше сесијата „Нови и експериментални податоци“, на која беа презентирани истражувања за користењето нови извори на податоци при процена на климатските ризици, како и примената на вештачката интелигенција во идентификувањето на недостатоците во статистиките поврзани со климатските промени и одржливоста.
На конференцијата учествуваше и претставничката на Народната банка Даница Уневска Андонова, која го презентираше трудот „Прогнозирање на македонскиот БДП со економски показател изведен преку ChatGPT: докази од машинското учење“.
Трудот, изработен со Магдалена Петровска, Неџати Куртиши и Елена Божиновска Стојчевска, покажува како алатките на вештачката интелигенција може да се користат за креирање економски показатели од одговорите во анкетите за очекувањата за растот на БДП и инфлацијата.
Според Народната банка, ваквите пристапи може да овозможат побрзо и попрецизно следење и процена на економската активност во земјава.
На конференцијата биле разгледани и теми поврзани со употребата на вештачката интелигенција за следење на инфлацијата, процената на климатските ризици за финансискиот систем, подобрувањето на квалитетот на економските податоци и користењето податоци од платежните системи за подобро разбирање на потрошувачката на домаќинствата.
Од Народната банка оценуваат дека учеството на нејзините претставници на меѓународната конференција потврдува дека статистичката практика во земјава ги следи современите трендови во примената на податоците и вештачката интелигенција во централното банкарство.