Меѓу 1.000 и 1.100 хектари со тутун и сончоглед се уништени во невремето со град што го зафати подрачјето на Општина Долнени. На дел од површините штетите достигнуваат и до 100 проценти.
Градот, кој според земјоделците бил со големина на орев, бил проследен и со силен ветер, по што на повеќе места посевите биле целосно уништени или полегнати. Најголеми штети има во Новоселани и Заполжани, но погодени се и Дебреште, Ропотово и Лажани.
Претседателот на Сојузот на тутунски здруженија Кире Ристески ја оцени состојбата како катастрофална и предупреди дека дел од производителите ќе останат без значителен дел од очекуваниот род. Дополнителен проблем е што производството на голем број земјоделци не е осигурено.
Од Сојузот најавуваат дека ќе побараат промени со кои при склучувањето договори за откуп на тутунот повторно задолжително би се склучувале и договори за осигурување. Според Ристески, на тој начин земјоделците би можеле барем делумно да бидат обесштетени при вакви елементарни непогоди.