Силно невреме ја погоди северна Италија, при што налети на ветер со ураганска јачина предизвикаа превртување на неколку лесни авиони на аеродромска писта.
Според информациите, четири авиони биле превртени за време на бурата. Еден авион бил однесен од силниот ветер за време на слетувањето, додека три други паркирани летала биле поместени по пистата од налетите на ветерот, а потоа и превртени.
Објавените видео снимки покажуваат како ветрот ги фрла авионите по пистата „како играчки“.
Како што пренесува „Си-Ен-Ен“, инцидентот се случил откако силната бура го зафатила подрачјето на Форли, во италијанскиот регион Емилија-Ромања. На ова подрачје биле регистрирани налети на ветер со брзина од околу 120 километри на час.
Поради екстремните временски услови и настанатата штета, аеродромот веднаш бил затворен за сообраќај.