Министерот за спорт Борко Ристовски денеска присуствуваше на одбележувањето на 34-годишнината од формирањето на Армијата, што се одржа во Кампот за обука на вода во Охрид.
На централната свеченост, во присуство на државниот и воен врв, Ристовски упати честитка до сите армиски припадници и ветерани по повод 18 Август – Денот на Армијата.
„Денеска им оддаваме почит на луѓето кои ја избрале честа да ѝ служат на својата татковина. Македонската Армија е создадена заедно со независна Македонија и повеќе од три децении е еден од столбовите на нашата државност. Генерации македонски војници ја носеле униформата со достоинство, професионалност и подготвеност да застанат во одбрана на државата и на нејзините граѓани“, истакна Ристовски.
Тој потенцираше дека и покрај модернизацијата и членството во НАТО, најважниот ресурс во одбранбениот систем останува човекот.
„Денес имаме современа Армија, рамноправен дел од НАТО, која се модернизира и се подготвува за новите безбедносни предизвици. Но технологијата и опремата се менуваат, а едно останува исто – човекот во униформа и неговата обврска кон државата, знамето и народот. На сите припадници на Армијата, на ветераните и на семејствата кои стојат зад нив им го честитам 18 Август – Денот на Армијата. Нека е вечна Македонија! Честит Ден на Армијата!“, порача министерот за спорт.