На територијата на државата до 13 часот се регистрирани вкупно 10 пожари на отворен простор, од кои пет се активни, два се ставени под контрола, а три се целосно изгаснати, соопшти Центарот за управување со кризи (ЦУК).
Според податоците од ЦУК, активни пожари има на следните локации:
- Општина Студеничани: кај селата Моране, Вртекица и Рамни Габер, каде гори мешана шума;
- Општина Македонски Брод: кај местноста Видуш, како и кај селата Драгов Дол и Локвица, каде се опожарени ниска вегетација, нискостеблеста шума и грмушки;
- Општини Велес и Зелениково: кај село С’лп и местноста Горно Село, со проширување кон село Карабуњиште (Велес), како и кон селата Добрино и Тисовица (Зелениково), каде гори ниска вегетација, дабова, габерова и квалитетна дабова шума;
- Општини Јегуновце, Желино и Сарај: кај селата Копанце и Туденце (Јегуновце) и село Церово (Желино), со проширување кон село Бојане (Сарај), каде е зафатена мешана шума;
- Општина Штип: во населбата Балканска, каде гори ниска вегетација.
Под контрола се ставени пожарите на локалните депонии во Општина Кратово (кај село Железница) и во Општина Делчево.
Пожарникарите целосно изгаснаа три пожари: во Општина Куманово кај село Табановце (местност Сланиште), како и два пожари во Општина Крушево – кај селата Алданци и Норово, и кај селата Борино и Житоше.