Времето утре во земјава ќе биде нестабилно, со локални врнежи од пороен дожд, грмежи и засилен ветер, најавуваат од Управата за хидрометеоролошки работи (УХМР).
Според синоптичарите, во среда услови за појава на нестабилност ќе има претежно во планинските региони.
Од четврток следува значителна промена на временските прилики и период на многу топло време. За време на викендот се очекува дневните температури на повеќе места низ земјава да надминат 40 степени.
Денеска низ земјава преовладува сончево и топло време со мала локална облачност и слаб до умерен ветер од променлив правец. Максималните температури се движат во интервал од 30 до 37 степени.
Во Скопје денеска се задржува претежно сончево и топло време со слаб ветер од променлив правец.