Втор смртен случај од западнонилска треска е регистриран во земјава, откако на Клиниката за инфективни болести и фебрилни состојби во Скопје почина 72-годишен маж од Скопје. Веста ја соопшти директорот на клиниката, Фадил Цана.
„Поради транспарентност и коректно информирање на јавноста, сакам да информирам дека, за жал, кај пациент на 72-годишна возраст со лабораториски потврдена инфекција со West Nile вирус и тешка клиничка слика на менингоенцефалитис, настапи смртен исход“, изјави Цана.
Пациентот бил примен во тешка општа состојба со изразена невролошка симптоматологија и тешка форма на воспаление на мозокот и мозочните обвивки. И покрај максималните напори на лекарите и мерките за интензивно лекување, состојбата му се влошувала. Директорот нагласи дека сите досегашни жртви се повозрасни лица со присутни коморбидитети и придружни заболувања.
Во моментов, на Инфективната клиника се хоспитализирани вкупно 24 пациенти.
„Кај 19 е лабораториски потврдена инфекција со West Nile вирус, додека пет се суспектни и се во тек на дијагностичка постапка“, појасни Цана.
Од нив, седум пациенти се со потешка клиничка слика и се наоѓаат под постојан интензивен медицински надзор, а петмина се приклучени на механичка вентилација. Другите хоспитализирани пациенти се сместени на Одделот за невроинфекции и се во стабилна состојба.
Од Клиниката велат дека состојбата на сите заболени се следи континуирано, а јавноста ќе биде навремено информирана за какви било промени. Ова е втор смртен случај во земјава, откако претходно од истиот вирус почина 83-годишен пациент.