Лажен полицаец успевал цели 18 месеци да се претставува како службено лице и да учествува во официјални полициски постапки на аеродромот „Брник“ во Љубљана, откривајќи низа сериозни пропусти во словенечкиот безбедносен систем.
Според извештајот од вонредниот надзор на повеќе од 50 страници, објавен во весникот „Вечер“, полицијата имала информации за лицето уште во септември 2025 година, но не реагирала соодветно. Тој бил откриен дури на 15 октомври, откако бил забележан на фотографии како обезбедува место на сообраќајна несреќа на аеродромот.
При апсењето кај него биле пронајдени фалсификувана легитимација, гасен пиштол и бележник. Документацијата открила дека од април 2024 до септември 2025 година тој учествувал во најмалку 16 полициски акции и се движел во простории каде што се чуваат доверливи податоци.
Лажниот полицаец претходно работел како обезбедување на аеродромот, поради што добро ги познавал објектите и службениците. Пред колегите се претставувал како помошен полицаец, а опремата ја купувал преку интернет-порталот „Bolha“.
Надзорот утврди неправилности и по приведувањето. Не бил извршен претрес во неговиот дом ниту му биле одземени електронските уреди, по одлука на дежурните обвинители и полициски службеници.
Случајот резултираше со дисциплински постапки. Полицаецот кој соработувал со него подоцна доби отказ поради друг прекршок, додека командирот на аеродромската полиција, Јуре Лешњак, доби предупредување пред отказ. Сменет беше и директорот на Полициската управа Крањ, Урош Повалје.
Специјализираното државно обвинителство потврди дека е донесена обвинителска одлука против едно службено лице и против лажниот полицаец, но деталите засега не се соопштуваат.