Иран има намера да им наплаќа такси на комерцијалните бродови за минување низ Ормуската Теснина, соопшти денеска Министерството за надворешни работи во Техеран.
Иранските медиуми го цитираа портпаролот Есмаил Багеи кој изјави дека Иран во соработка со Оман работи на „механизми за следење на безбедноста, заштита на животната средина и борба против криминалот на море“.
Таксите и надоместоците ќе се наплаќаат за поморските услуги што им се обезбедуваат на бродовите, објасни тој.
Спорот околу транзитните права во протокот, кој е клучна меѓународна рута за нафта, гас и вештачки ѓубрива, се смета за еден од главните поттикнувачи на неодамнешната ескалација на воениот конфликт меѓу Вашингтон и Техеран, пренесе ДПА.
Пред Соединетите Американски Држави и Израел да ја почнат војната против Иран на 28 февруари, пловидбата низ протокот се одвиваше во голема мера непречено, без патарини или такси за транзит.
Ормуската Теснина на својата најтесна точка мери само околу 39 километри.
Бидејќи Иран и Оман полагаат максимално право на 12 наутички милји (22,2 километри) кои се дозволени според Конвенцијата на Обединетите нации за правото на морето (UNCLOS) како нивни територијални води, во протокот не постојат меѓународни води.
Конвенцијата UNCLOS гарантира право на транзитен премин и забранува блокада на комерцијални бродови. Иран не го прифаќа овој правен став.
Целта на САД е да го вратат транзитот на нафта и гас низ Ормуската Теснина на нивото од пред војната, изјави вчера потпретседателот Џеј Ди Венс.
Багеи одговори и на тврдењето на американскиот претседател Доналд Трамп од вчера, пренесено од Аксиос, дека Вашингтон и Техеран се вовлечени во „шаховска партија“.
– Независно дали зад сцената или пред рефлекторите, Иранците се докажаа како професионални шахисти, изјави портпаролот на иранското МНР.