Православните верници денеска го одбележуваат празникот посветен на Светиот великомаченик Пантелејмон, еден од најпочитуваните светители во христијанството.
Според преданието, Свети Пантелејмон се родил во Никомидија од татко незнабожец и мајка христијанка. Уште во младоста ја изучил лекарската вештина, а подоцна се крстил и го прифатил христијанството.
Се верува дека Господ му дал благодат да лекува сите видови болести, не само преку лекарската вештина, туку и со силна молитва. Меѓу неговите најпознати исцеленија е враќањето на видот на слепец од кого останатите лекари се откажале, по што поради завист бил обвинет пред властите дека е христијанин.
Поради својата вера бил изложен на тешки маки, а откако властите виделе дека тој не се поколебува, го испратиле на губилиште под маслиново дрво каде што пострадал во 304 година. Во христијанскиот свет се верува дека тој продолжил да исцелува преку своите свети мошти.
Со овој голем празник се поврзани и повеќе народни обичаи и верувања. Се смета дека денот е поволен за започнување бизнис или каква било нова работа, бидејќи се верува дека секој труд на овој ден е благословен и носи успех.
Исто така, Свети Пантелејмон важи за заштитник на патниците и на сите луѓе на кои патот им е втор дом, па затоа се препорачува за оние кои планираат патување да тргнат токму на овој ден.
Меѓу народните обичаи постои и верувањето дека доколку во црква се сретнат две непознати лица кои го слават овој ден како куќна слава, треба да си честитаат и да се прегрнат, бидејќи се верува дека се роднини.