Православните христијани денеска, 7-ми август, го празнуваат успението на Света Ана, мајката на Пресвета Богородица Марија.
Света Ана била ќерка на свештеникот Матан, од коленото Левиево. По долг и богоугоден живот, таа се упокоила во длабока старост.
Денеска верниците го празнуваат нејзиното успение, додека нејзиниот главен празник се одбележува на 9 септември, под кој датум се напишани службата и житието.
Според преданието, таа со својот сопруг Јоаким живеела 50 години без деца. Јоаким со години бил скршен од болка поради тоа, па во една прилика заминал во пустината каде што со денови тагувал и се молел.
Таму му се укажал ангел кој му соопштил дека Господ ќе го благослови со дете, а истото видение подоцна го имала и Ана. Врз основа на тоа ветување, во нивните подоцнешни години се родила Марија, Пресвета Богородица.
Кога им се родила ќерката, Ана и Јоаким се ветиле пред Господ дека детето ќе му го посветат на храмот.
Поради значењето на овој настан и вербата во нејзината благодат, во народот се верува дека луѓето што го носат името Ана се среќни и носат позитивни животни промени.