Мајка и баба кои беа пронајдени мртви со нивните четири деца во стан во американската држава Њујорк планирале да го убијат целото семејство и да извршат самоубиство.
Според истражителите, тие го направиле тоа под изговор да ги спасат децата од наводна злоупотреба од нивниот татко.
Шефот на полицијата во Механиквил, Вилијам Рабит, изјави дека по повеќе од еден месец собирање докази е утврден наводниот мотив на Ејми Стедман (64) и нејзината ќерка Сара Мајерс (44).
Мајката и ќерката, како и четирите деца на Мајерс – Харпер (13), Хадсон (11), Гевин (10) и Грејслин (10) – беа пронајдени мртви на 23 јуни, откако никој ги немаше видено повеќе од една недела.
Според полициските сознанија, планирањето на убиството започнало на 5 јуни. Стедман и Мајерс разговарале за планот преку СМС-пораки. Исто така, биле пронајдени и рачно напишани белешки во кои се наведува дека ги извршиле убиствата за да ги заштитат децата од наводна злоупотреба од нивниот татко кој живее во Јута.
Полицијата соопшти дека не успеала да ги потврди наводите за злоупотреба, а таткото на децата ги негирал овие обвинувања.
Во деновите пред нивната смрт, Стидман и Мајерс во повеќе наврати купувале апчиња за спиење и други лекови на рецепт. Пораките укажуваат дека убиството и самоубиството се случиле на 10 јуни, а во нив разговарале како да им ги дадат лековите на децата.
„Овие комуникации се важни бидејќи документираат многу повеќе од само планирање. Тие покажуваат дека Стидман и Мајерс комуницирале и се координирале додека се одвивале убиствата“, рече Рабит.
Истражителите открија дека едно од децата, Гевин Хармон, било избодено повеќе пати додека се обидувало да се одбрани. Било утврдено и дека Стидман на интернет пребарувала термини како „каде е најсмртоносното место за прободување“ и „да се најде каротидната артерија во вратот“.
Полицијата претходно спровела две проверки на 13 и 17 јуни, но дури на 23 јуни влегла во станот по пријава од соседите за сомнителен мирис.
„Ејми Стидман и Сара Мајерс постојано ги прикажуваат овие убиства како начин за заштита на децата. Без оглед на тоа што можеби го сметале за оправдување за нивните постапки, убиството на четири деца не може да се опише како заштита“, рече Рабит.
Истрагата за овој случај сè уште продолжува.