Околу 5.000 затвореници во Англија и Велс ќе бидат предвремено ослободени од затворите во текот на следните 10 месеци, почнувајќи од октомври.
Одлуката следува откако британската Влада го промени првичниот план за намалување на пренатрупаноста во затворските капацитети.
Според првичниот план, од септември требаше да бидат ослободени околу 6.000 затвореници. Сепак, по интервенцијата на британскиот премиер Енди Бернам, околу 1.000 осуденици за силување, сериозни сексуални злосторства против деца и сексуална злоупотреба беа исклучени од оваа шема, пренесува Гардијан.
Британскиот министер за правда Алекс Норис изјави дека би сакал да види повеќе затвореници исклучени од програмата, но предупреди дека тоа ќе доведе до „колапс“ на затворскиот систем поради недостаток на капацитет.
Тој посочи дека целта на оваа реформа е долгорочно решавање на проблемот со пренатрупаноста, без потреба од идни итни програми за ослободување.
Според новите правила, одредени осуденици за специфични сексуални и насилни злосторства сè уште ќе можат да излезат по отслужување на половина од казната, доколку немале сериозни дисциплински прекршоци.
Одлуката веќе предизвика силни реакции кај семејствата на жртвите.
Премиерот Бернам изјави дека програмата е последица на долгорочно недоволно инвестирање во затворскиот систем помеѓу 2010 и 2024 година, додавајќи дека без овие мерки затворскиот систем би можел да се распадне и да ги загрози полицијата и судовите.
Властите најавија дека сите предвреме ослободени лица ќе бидат под построг надзор, кој за одредени категории вклучува и задолжително Џи-пи-ес (GPS) следење.
Конзервативната опозиција ги критикуваше промените како недоволни и најави дека доколку дојде на власт ќе ги зголеми затворските капацитети, ќе изнајмува затвори во странство и ќе ја забрза депортацијата на осудените странски државјани.