Од 6 часот утринава продолжува координираната акција за гаснење на пожарот во реонот на село Раец, информира градоначалникот на Кавадарци, Митко Јанчев, преку објава на Фејсбук.
Тој посочи дека екипите се распоредени на потезите Дреново – Ќесендре и Раец – Дреново – Ќесендре, каде продолжуваат активностите за ставање на пожарот под контрола.
Во интервенцијата се вклучени екипи од ЈП „Комуналец“ – Кавадарци, Територијалните противпожарни единици од Кавадарци и Неготино, Дирекцијата за заштита и спасување, ОВР Кавадарци и ЈП „Национални шуми“.
На терен се користи расположлива механизација и опрема, меѓу кои булдожер, цистерни за вода, скипови, шумарски камион, како и околу 20 возила и теренски машини – унимози, пинцгауери, џипови и друга опрема потребна за интервенцијата.
Според Јанчев, во акцијата се ангажирани околу 45 лица – пожарникари, полициски службеници, вработени од надлежните институции и оператори на механизацијата, сите со соодветна заштитна и противпожарна опрема.
„Целта на денешната акција е целосно локализирање и гаснење на пожарот. Благодарност до сите кои со пожртвуваност и професионалност се вклучени во оваа тешка и одговорна задача“, наведе Јанчев.