Украинскиот претседател Володимир Зеленски изјави дека, според прелиминарните податоци, Русија за првпат по подолг период употребила севернокорејска балистичка ракета за време на нападот врз селото Радушна, каде загинаа шест лица.
Нападнатото село Радушна се наоѓа во близина на Криви Рог, родното место на украинскиот претседател.
Во своето вечерно видео обраќање, Зеленски ги објави првичните сознанија од терен и најави дополнителни проверки.
„Во Радушна, Русите употребија севернокорејска ракета за прв пат по долго време, ова го покажуваат прелиминарните податоци“, рече Зеленски.
Тој објасни дека дополнително ќе бидат спроведени анализи за да се потврди потеклото на ракетата, обвинувајќи го сојузот на Москва и севернокорејскиот режим за убиствата на украинските деца.
Покрај осудите за нападот, тој упати порака до меѓународната заедница за засилување на воената поддршка.
„Секако, многумина низ целиот свет го осудија овој напад денес. Имаше многу изрази на сочувство за загубата на животи. Европските земји, исто така, дадоа многу изјави затоа што руска ракета влета на полска територија и експлодираше некаде на поле во близина на Лублин. Сепак, најважно е не само сочувство и осуда, туку и ракети за воздушна одбрана и притисок врз Русија што може да ја запре оваа глупава руска војна, сите нивни напади и нивниот терор“, рече Зеленски.
Тој ја истакна и потребата од поддршка од сојузниците на Запад.
„Искрено се надевам дека сите наши партнери – пред сè нашите американски партнери, како и нашите пријатели во Европа – ќе почувствуваат дека вистинските човечки животи зависат од тоа дали ќе ни помогнат, дали ќе ѝ помогнат на Украина“, додаде тој.
Во руските балистички ракетни напади врз Украина во четвртокот загинаа најмалку седум лица. Меѓу шесте жртви во близина на Криви Рог има и две девојчиња на возраст од пет и 12 години, а уште осум лица се повредени, додека едно лице го загуби животот во Киев.