Лекарите во Германија се борат за животот на 45-годишен маж кој се здобил со тешки повреди откако батерија што ја носел во ранецот експлодирала додека возел велосипед. Во инцидентот со полесни повреди се здобило и деветгодишно момче кое било во негова близина.
Несреќата се случила во местото Јушен, во јужниот дел на покраината Тирингија. Мештаните од градот со околу 1.500 жители слушнале силна експлозија, по што затекнале запален човек и шокирано дете во близина.
Според информациите од локалните медиуми, од зачудувачки и сè уште непознати причини експлодирала батерија од квад-велосипед која 45-годишникот ја пренесувал во својот ранец.
Од силната експлозија се запалиле ранецот и облеката на мажот. Мештаните веднаш реагирале со канти со вода за да го изгаснат пламенот додека пристигнат службените екипи, а остатоците од детонацијата ја запалиле и блиската жива ограда и ливада.
На терен веднаш пристигнале противпожарни екипи, медицинска помош и хеликоптер со кој повредениот бил префрлен на понатамошно лекување.
„45-годишниот маж претрпел исклучително сериозни повреди на грбот и левата страна од телото и морал итно да биде префрлен со хеликоптер во специјализирана клиника во Хале. Детето претрпело полесни повреди“, изјави портпаролката на полицијата Ана-Катрин Зајферт.
Криминалната полиција во Зул започна истрага за да ги утврди причините што довеле до експлозија на батеријата.