Обвинителството во Бугарија поднесе обвинение против 48-годишен маж под сомнение за обид за убиство на неговата сопруга на особено суров и мачен начин, по претходна семејна расправија во селото Медовце.
Според досегашните информации од истрагата, осомничениот под дејство на алкохол прво вербално, а потоа и физички ја нападнал 48-годишната сопруга Фајзе, по што ја полил со бензин и ја запалил. Куќата на семејството по инцидентот е запечатена и се наоѓа под полициски надзор, а обвинителството бара притвор за осомничениот.
Повредената жена со изгореници од втор и трет степен на околу 40 проценти од телото е хоспитализирана на интензивна нега во Воената болница во Варна, каде што лекарите се борат за нејзиниот живот.
Родината на жртвата, Хабибе Хусеин, во изјава за медиумите ги опиша драматичните моменти по инцидентот.
„Слушнав ужасни гласови, а децата врескаа и се обидуваа да помогнат. Прашав што се случило, а мојата роднина ми рече: „Исмаил ме поли со бензин“, рече Хабибе.
Таа додаде дека поради доцнењето на брзата помош, сами ја однеле повредената жена до најблиската здравствена установа во Далгополо.
„Не можам да спијам, не можам да јадам. Сè уште го чувствувам мирисот на братучетка ми. Не изгледаше како човек, изгледаше како зомби – беше цела изгорена. Никогаш не сум видела нешто слично на филмовите“, рече Хабибе.
Соседите велат дека семејството изгледало хармонично и неодамна се вратило од привремена работа во Франција. Соседката Гулзарија Хусеин изјави дека двојката делувала складно во секојдневниот живот.
„Работеле заедно во дворот, заедно запалиле оган. Може да се каже дека биле идеални луѓе, идеално семејство“, рече соседката Гулзарија Хусеин.
За трагедијата се огласи и градоначалникот на селото Медовец, Мустафа Исмаил.
„Ситуацијата е многу тешка. Роднините и соседите ќе даруваат крв, чекаме добри вести и се надеваме дека жената ќе се опорави“, рече тој.
Според полициските сознанија, по чинот осомничениот самиот се обидел да го изгасне огнот така што ја однел сопругата во бањата и ја поливал со вода, при што и самиот здобил изгореници на рацете. Двојката има две деца, а за 12-годишниот син грижа преземаат роднините и социјалните служби.