Повеќе од 250 доброволни пожарникари од противпожарните друштва низ земјава се собраа на постројување во касарната „Гоце Делчев“ во Општина Аеродром, во организација на Дирекцијата за заштита и спасување.
Целта на активноста била утврдување на бројноста и подготвеноста на доброволните пожарникари кои ќе бидат дел од Тимовите за брз одговор на ДЗС и ќе можат организирано да се вклучат во справување со летните пожари на отворен простор.
На постројувањето се обратил директорот на ДЗС и командант на Силите за заштита и спасување, Стојанче Ангелов, кој ги презентирал плановите и очекувањата за претстојната противпожарна сезона.
Од ДЗС информираат дека била претставена и новата организациска поставеност, со која треба да се подобрат координацијата, командувањето и вклучувањето на доброволните пожарникари во системот за заштита од пожари.
По постројувањето бил одржан работен состанок на кој доброволните пожарникари размениле искуства и предлози за подобрување на функционирањето на системот за заштита и спасување во текот на летната сезона.