Претседателката на Либерално-демократската партија (ЛДП) и пратеничка, Моника Зајкова, оцени дека постои несогласување меѓу ставовите на власта за двојните државјанства, изборните права и учеството на дијаспората.
„Мене малку сѐ ова ми наликува на политичка шизофренија. Лош збор е и можеби не треба да се соопшти, но да го појаснам: тоа е кога вие кажувате две контрадикторни работи, а тврдите дека сте конзистентни во политиките“, изјави Зајкова во денешното гостување во Радио Лидер.
Таа потсети дека пред неколку месеци владејачкото мнозинство предложило закон со кој би се ограничиле двојните државјанства за пратеници, но дека сега, според неа, нема конкретно решение.
„Ајде да се вратиме неколку месеци наназад. Дали владејачкото мнозинство поднесе закон со кој бара нели, да се забранат двојни државјанства за пратениците, за да се покаже на јавноста дека немале двојни пасоши? И сега случајно запна и ‘нема решение’“, рече Зајкова.
Според неа, власта од една страна ја повикува дијаспората да учествува и да придонесува, а од друга страна, како што вели, се доведува во прашање можноста нејзини припадници да бидат избрани на функции.
„Не може вие да им го одземате пасивното избирачко право, а да им велите ‘еве ви активно избирачко право’“, порача Зајкова.
Претседателката на ЛДП побара доколку се донесе закон за двојни државјанства, тој да важи и за владините функционери, а потоа да се разговара за прашањата поврзани со електронското гласање и изборниот процес за дијаспората.