Во касарната „Гоце Делчев“ во Општина Аеродром денеска ќе се одржи постројување на доброволни пожарникари од сите активни доброволни противпожарни друштва во државата.
Настанот е организиран со цел да се утврди бројот на доброволци кои се подготвени организирано да се вклучат во гаснењето на летните пожари на отворен простор преку Тимовите за брз одговор на Дирекцијата за заштита и спасување (ДЗС).
Од ДЗС информираат дека директорот на Дирекцијата и командант на силите за заштита и спасување, Стојанче Ангелов, ќе ги претстави плановите и очекувањата за претстојната летна сезона, како и насоките за формирање нова внатрешна структура и хиерархија за поефикасна координација и командување со тимовите составени од доброволни пожарникари.
Според Дирекцијата, целта на новата структура е доброволните пожарникари попрецизно, поефикасно и порационално да бидат интегрирани во системот за гаснење пожари. Се очекува таа да овозможи побрза размена на информации, поефикасно донесување одлуки, појасно пренесување на наредби и подобра дисциплина на терен.
Ангелов ќе се осврне и на идните планови за развој на доброволното пожарникарство во земјата.
По постројувањето ќе се одржи работен состанок на отворено, на кој доброволните пожарникари ќе имаат можност за меѓусебно запознавање, размена на искуства и дискусија за потребите и предизвиците во текот на летната сезона.