Игралиштето на улица „Ѓорѓи Сугаре“ во скопска Кисела Вода, кое беше полеано со масло, е целосно санирано и повторно безбедно за најмладите.
-Детското игралиште на ул. „Ѓорѓи Сугаре“ е повторно безбедно и подготвено за игра. Екипите на Општина Кисела Вода веднаш по пријавата излегоа на терен и ја завршија санацијата на реквизитите кои минатата седмица беа намерно уништени и полеани со моторно масло.
Најостро го осудуваме овој чин на намерно уништување. Недозволиво е просторот каде што нашите деца треба да се радуваат и да се дружат, да биде цел на ваков срамен вандализам. Како општина, континуирано вложуваме сериозни средства за изградба на нови и обнова на постоечките игралишта, со цел да овозможиме подобри услови за сите.
За жал, кога неодговорни поединци намерно ги оштетуваат овие капацитети, средствата кои треба да се инвестираат во нови проекти, мораме да ги пренасочуваме за поправки и чистење на веќе изграденото.
Со цел да се спречат вакви инциденти во иднина, Општина Кисела Вода воведува засилен инспекциски надзор на јавните површини. Воедно, испраќаме силен апел до сите граѓани дека чувањето на јавните добра е наша заедничка граѓанска должност. Доколку забележите какво било деструктивно однесување, веднаш пријавете кај надлежните институции, за сторителите да бидат соодветно санкционирани.
Да бидеме совесни и заедно да го чуваме просторот каде што растат нашите деца!, напиша градоначалничката на Кисела Вода, Бети Стаменкоска Трајкоска.
За потсетување, во групата на Фејсбук насловена „Кисела Вода-Пријави проблем”, беа објавени фотографии од детско игралиште во населбата, полеано со уље.
-„Вака јавно да го прашам тој што детските реквизити ги истури со уље во паркчето каде што дечињата од најмали до најголеми се радуваат ,дали сега помирно ќе спиеш, дали совеста ќе те копка?
Не бе другари, не е до државата, не е до општината до нас е. И после зошто младите не раѓале, зошто си заминувале од државата. Од вакви покондурени како тебе !!!!!
Лизгалкиве се наоѓаат на ул. Ѓорги Сугаре веднаш до зградата на дабар. Се надевам дека некој ќе превземе нешто и ќе ги врати во првобитна состојба”, стои во објавата на жителка на Кисела Вода.
Постот и фотографиите предизвикаа лавина од реакции на социјалната мрежа Фејсбук.
„99% сум сигурен дека ова е дело на постар намќор комшија, на кого му сметаат децата што играат, што му галамат под прозор”, стои во еден од коментарите.
„Потоа децата биле хулигани и демолирале. Еве доказ од кого учат. Секоја девијантна појава потекнува од дома”, стои во друг коментар на постот.
„Во парк во Битола имаше измет од човек на лулашка”, стои во коментар.
„Сега треба да се исчисти и се повеќе деца да играат, да разбере дека нема да ги тргне децата од таму”, стои во уште еден коментар.