ВМРО-ОКГ обвинува дека опозицијата се повлекува од преговорите за Изборниот законик затоа што се плаши од избори и пораз. Но оваа теза е нелогична и лесно разоткриена, се вели во соопштението од СДСМ.
-Ако ВМРО-ОКГ и Мицкоски се толку силни како што тврдат, зошто толку инсистираат на закон кој овозможува неконтролирана кражба на гласовите од дијаспората? Ако се толку убедени во својата победа, зошто им е потребна изборна манипулација? Фактите се јасни: ВМРО изгуби над 150.000 гласови на последните избори. Рејтингот на Мицкоски е на историски минимум поради секојдневните лаги и неисполнети ветувања, велат СДСМ.
Додаваат дека ако навистина беа толку силни, немаше да се фаќаат за вакви методи.
-Единствените кои се плашат од пораз на изборите се токму ВМРО и Мицкоски. Тоа не е страв само од опозицијата – тоа е страв од одговорност пред законот. Страв од тоа што ќе се случи кога ќе треба да одговараат за криминалните тендери, за кражбата на парите на граѓаните и за систематската корупција. Затоа и се брза со предвремени избори. Падот на рејтингот и загубата на стотици илјади гласови го притискаат Мицкоски да ги распише што поскоро, стои во соопштениерот.
Додаваат дека веќе ниту пропагандата, ниту 40 отсто од орбановите медиуми не можат да ги сокријат неуспесите на оваа влада на сите полиња – економскиот колапс и празниот буџет се видливи за секој граѓанин.
-Овие „големи патриоти“ со бугарски државјанства, европски пасоши и фирми во Бугарија, сега се загрижени за сопствената судбина. Не за иднината на Македонија, туку за сопствената одговорност. Затоа сакаат да ги наместат следните избори – за да ја одложат правдата што неизбежно доаѓа. Народот не е наивен. Лаги, манипулации и изборни кражби повеќе не поминуваат. Народот ќе победи. Европска Македонија ќе победи, велат тие.