Осомничен за убиството на офицерот на АРМ во Батинци во 2025, но и за решетањето на возило „форд“ во истото село, една година претходно е едно од лицата поврзани со криминалната група „Беланоца“ кое е уапсено во Драч, Албанија со помош на албанската полиција и Американската ДСС.
Според информации на Press24, 26-годишниот Муса Џавит е еден од двајцата приведени.
Џавит се сомничи дека пукал во офицерот на АРМ во Батинци, но и една година претходно во истото село во возило „форд“ во кое се возеа двајца жители на селото Црн Врв. Едниот од нив е убиен, а другиот заврши со тешки повреди.
Според пишувањата на КОД од пред речиси една година, Џавит претходно бил осуден на 2 и пол години затвор за поседување оружје.
Во акцијата на албанската полиција и Американската ДСС приведен е и Сенафи Нуредини, 34-годишник роден во Норвешка. И тој се сомничи за поврзаност со „Беланоца“.
-Врз основа на информација од Македонската полиција, во Драч, Р.Албанија спроведена е меѓународна полициска операција во која лишени од слобода се М.Џ.(26), роден во Скопје и С.Н.(34), роден во Норвешка, двајцата припадници на организираната криминална група „Беланоца“, за кои Интерпол има издадено меѓународни потерници за сторени кривични дела „убиство”, „убиство во обид”, „тешка телесна повреда”, „недозволено изработување, држење и тргување со оружје или распрскувачки материи” и „злосторничко здружување”. При лишувањето од слобода, кај лицата пронајдени се фалсификувани лични документи, за кои постои сомнение дека ги користеле за да ја напуштат територијата на нашата држава и да ја избегнат правдата. Акцијата е резултат на повеќемесечна соработка на Македонската полиција, Американската дипломатска безбедносна служба (ДСС) и безбедносните органи на Р. Албанија, соопштија претходно од Министерство за внатрешни работи.