Со презентација на докази обезбедени од телефонски апарати на дел од обвинетите, денеска во судницата во Идризово продолжи судењето за пожарот во кочанската дискотека „Пулс“.
Во судница беа презентирани комуникации меѓу обвинетите, меѓу кои и размена на пораки преку Фејсбук, Вибер и Месинџер.
Одбраната реагираше дека во дел од презентираните документи воопшто не се спомнува дискотеката „Пулс“.
Еден од адвокатите посочи дека обвинетите биле изложени на јавни навреди и осуди во медиумите. Тој побара повторно да биде презентирана комуникација во која, според него, еден од обвинетите и еден од оштетените разговарале за тоа дали малолетна ќерка да биде пуштена во „Пулс“.
„Од доказите на Обвинителството ни останаа уште градежните вештачења и градежните вештаци“, рече судијката Дијана Груевска-Илиевска на крајот од денешното рочиште.
По изведувањето на доказите на Обвинителството, материјални докази и сведоци ќе изведува и одбраната, која најави дека располага и со две вештачења.
Судењето го води судијката Дијана Груевска-Илиевска, а обвинението го застапува тим од 15 јавни обвинители.
Во пожарот во дискотеката „Пулс“, што се случи во Кочани на 16 март 2025 година за време на настап на групата ДНК, загинаа 63 лица, а повеќе од 200 беа повредени.
Следното рочиште е закажано за 14 јули.