Западна Европа го забележа најжешкиот јуни досега, покажуваат податоците на европската служба за следење на климата „Коперникус“. Регионот се соочува со нов топлотен бран, додека пожарите пустошат делови од Франција и Шпанија.
Според „Коперникус“, смртоносниот јунски топлотен бран ги зголемил температурите на површинскиот воздух во Западна Европа за 3,06 степени Целзиусови над просекот од последните децении.
На глобално ниво, јуни 2026 година бил за 0,56 степени потопол од просекот за периодот 1991-2020 година и за 1,39 степени потопол од прединдустриското ниво. Со тоа, месецот е втор најтопол јуни досега.
Климатската научничка Саманта Бургес од „Коперникус“ предупредува дека овие податоци покажуваат оти климатскиот систем продолжува да акумулира топлина. Последиците, според неа, се поинтензивни топлотни бранови, постојано загревање на океаните и зголемени ризици за луѓето, екосистемите и инфраструктурата.
Западна Европа во моментов се соочува со трет топлотен бран за шест недели, а сушата дополнително го зголемува ризикот малите пожари брзо да прераснат во неконтролирани огнени стихии.
Во последните денови, големи делови од јужна Европа беа зафатени од пожари, поради што Европската Унија испрати пожарникари и авиони за гаснење за да им помогне на националните служби.
Податоците објавени неделава покажуваат дека пожарите во ЕУ досега изгореле 56 проценти повеќе земјиште од вообичаеното. Во Франција изгорената површина е четири пати поголема од просекот за овој период од годината, со 35.400 хектари, додека во Шпанија е двојно над просекот, со 55.128 хектари зафатени од огнот.