Претседателот на Стопанската комора, Бранко Азески, денеска повторно порача дека бизнис заедницата бара отворање на границите, засилена борба против корупцијата и сивата економија, спроведување на гасификација, силна поддршка на извозот и континуитет во правните прописи.
Во своето обраќање на форумот организиран од Комората, Азески истакна дека регионот мора да ја продлабочи соработката и доследно да ги следи европските вредности.
Тој нагласи дека е неопходно заедничко делување во насока на економски напредок, посочувајќи дека без вистинска соработка нема одржлив развој.
-Бараме отворање на границите на сите можни начини. Го поддржуваме и ангажманот на Владата која во последните шест месеци заедно со бизнис секторот работи на унапредување на економската соработка со повеќе земји. Тоа треба да продолжи и во иднина – истакна Азески.
Тој оцени дека државата во изминатите години изградила значајни основи за справување со економските предизвици, но дека се потребни дополнителни реформи.
-Она што недостига е јасна платформа на темелни вредности од кои не смееме да отстапиме: борба против корупцијата и сивата економија, брза гасификација, поддршка на извозот и доследен континуитет на правните прописи. Овие приоритети се клучни за понатамошен развој – нагласи тој.
Азески додаде дека и покрај сериозните кризи во изминатите децении, државата покажала отпорност и напредок, но дека процесот на реформи мора да продолжи без застој.
-Нема враќање назад, мора да одиме напред. Потребна е вклученост на сите општествени чинители, од академската заедница до невладиниот сектор, за создавање политики во интерес на граѓаните и стопанството – порача Азески.
На форумот обраќања имаа и премиерот Христијан Мицкоски, министерот за надворешни работи Тимчо Муцунски и евроамбасадорот Михалис Рокас.