На 74-годишна возраст почина Виктор Вилис, препознатливиот водечки вокал и коавтор на легендарната американска диско група Village People. Музичарот роден во Тексас беше клучна фигура во подемот на групата кон глобална слава во текот на 1970-тите години.
Вилис беше коавтор на некои од најголемите хитови во поп-историјата, меѓу кои „YMCA“, „Go West“ и „In The Navy“, кои станаа неизбришлив дел од светската поп-култура.
Покрај по музиката, бендот беше планетарно препознатлив и по специфичните костими на членовите кои симболизираа различни мачо-ликови, а Вилис најчесто настапуваше како полицаец или морнарички офицер.
По напуштањето на групата во 1980 година, тој водеше долга правна битка за авторските права на неговите песни, која ја доби во своја корист, по што во 2017 година повторно се врати во бендот.
Еден од неговите последни големи настапи се случи во јануари 2025 година, кога го изведе култниот хит „YMCA“ на митингот пред инаугурацијата на американскиот претседател Доналд Трамп.
Веста за неговата смрт беше официјално споделена од страна на неговите колеги преку социјалните мрежи.
„Со длабока тага ја објавуваме смртта на Виктор Вилис, водечкиот пејач на Village People“, се вели во краткото соопштение. „Виктор почина во понеделник, 30 јуни 2026 година, по кратка, но агресивна болест. Ја молиме јавноста за приватност во ова тешко време.“
Заминувањето на Вилис означува крај на една значајна ера во историјата на светската диско музика.