Од денеска до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони за време на викендите и во денови со екстремно високи температури.
Забраната важи во следните термини: петок од 17:00 до 22:00 часот, сабота од 09:00 до 18:00 часот и недела од 09:00 до 22:00 часот.
АМСМ информира дека во деновите со екстремно високи температури, определени од Министерството за здравство, забраната ќе важи и од понеделник до четврток во периодот од 11:00 до 17:00 часот.
Ограничувањето не се однесува на возила кои превезуваат животни, цвеќе, хуманитарна помош, жито и житни култури, леснорасиплива стока, нафта и нафтени деривати, опасни материјали, како и возила кои вршат превоз за компании со договори за изведување проекти на државните патишта со ЈП за државни патишта.
На магистралниот пат А2, делница Скопје – Охрид – Скопје (со важност до 1 септември), се забранува движење на тешки товарни возила со маса над 7,5 тони за време на викендите, и тоа: петок од 15:00 до 22:00 часот, сабота од 07:00 до 12:00 и од 18:00 до 24:00 часот и недела од 07:00 до 22:00 часот.
Овој посебен режим се воведува во текот на летото со цел намалување на застојот во сообраќајот, побрз проток на возилата и олеснето движење на туристите кон туристичките дестинации во земјата.