Пратеникот од ВМРО-ДПМНЕ Петар Ристески, кој учествува на Парламентарното собрание на Процесот за соработка во Југоисточна Европа (SEECP) во Софија, порача дека е неопходно трајно решение за статусот на професионалните возачи и превозници во рамки на Шенген зоната.
Во своето обраќање, Ристески истакнал дека ограничувањата поврзани со престојот на возачите во меѓународниот патен транспорт создаваат проблеми во секојдневното работење на транспортните компании од регионот. Тој нагласил дека е потребно изнаоѓање одржливо решение кое ќе овозможи непречено извршување на професионалните обврски, при истовремено почитување на безбедносните и миграциските правила на Европската унија.
Според соопштението од ВМРО-ДПМНЕ, по дебатите во рамки на форумот бил прифатен компромисен амандман во Завршната декларација, со кој се повикуваат земјите учеснички заеднички да работат на решавање на транспортните и логистичките прашања во Шенген зоната и регионот на Југоисточна Европа.
Од партијата посочуваат дека амандманот добил поддршка од сите пет земји членки на Европската унија кои учествуваат во SEECP – Словенија, Хрватска, Романија, Бугарија и Грција.